Taga Ermita gisampolan sa Oplan Hipos sa CCPO

CEBU, Philippines — Nadakpan sa kapulisan sa City Mobile Force Company sa Cebu City Police Office(CCPO) ang tulo ka mga sugarol dihang nagpahigayon sila og Oplan Hipos sa Sitio Ermita Proper, Barangay Ermita, siyudad sa Sugbo pasado alas 2 sa kaadlawon kagahapon, Biyernes, Mayo 24, 2024.

Nasikop sila si alyas Cyde, 29 anyos, wala’y trabaho ; alyas Jose, 31 anyos, wala’y trabaho ug si alyas Lito, 34 anyos, sila nagpuyo sa Barangay Ermita ug T. Padilla ning siyudad.

Nasakmit gikan sa mga dinakpan ang tulo ka sinsiyo nga gigamit sa hantak apan dihang girikisa ang mga suspetsado usa kanila nga mao si alyas Cyde kay nakuhaan og  usa ka unit sa snub-nose .38 caliber revolver nga dunay duha ka buhing bala.

Ang Cebu City Police Office matag karon ug unya mohimo og Oplan Hipos sa tawo sa palibot nga nalambigit sa illegal nga kalihukan.

Nagkanayon si Police Lieutenant Colonel Janette Rafter, Deputy City Director for Administration sa Cebu City Police Office nga ang Oplan Hipos usa ka anti-criminality campaign diin ang mga police mag roving sa mga suok nga bahin sa mga barangay.

Kini aron mabadlong kining mga naghimo og mga aktibidad nga makabalda na hinoon sa kalinaw sama sa sugal, inom kilid sa karsada panahon sa lawom nga kagabhion ug uban pa. 

“Kining Oplan Hipos mao ni usa sa atung mga anti-criminality program sa CCPO nga gipatuman nato, random ni nga mosulod sa interior portion sa kabarangayan aron mo patuman sa mga city ordinances,” ni Rafter pa.

Epektibo matod pa ang maong programa gumikan kay kadtong mga istambay sa gawas nga maabtan og kadlawon mabadlong aron papaulion. IBM BANAT NEWS