Panag-away sa mga minors diha sa Lapu-Lapu ipasusi sa kapolisan

CEBU, Philippines — Gimando ni Police Colonel Ali Baon, Officer-In-Charge sa Lapu-Lapu City Police Office (LCPO) ang paghimo og imbestigasyon sa nahitabong panag-away sa grupo sa mga minor de edad nga mga babaye nga nahitabo sa Hoops Dome sa Barangay Gun-ob sa siyudad sa Lapu-Lapu. Ang maong panag-away miresulta sa pagkabun-og sa usa kanila nga maoy hinungdan sa paghilandig niini sa tambalanan.

Matud pa ni Baron nga ang dapit diin nahitabo ang panag-away nahimutang lang sa atbang nga bahin sa Police Station 3 hinungdan nga kinahanglan kini nga imbestigahon aron masuta kun nganong walay nakabadlong sa mga minor de edad.

Sa pagkakaron ang mga nalambigit sa away kasamtangan nga gipaubos sa custody sa City Social Welfare and Development Office. Si Baron miingon nga ilang himoon ang hugot nga pagbantay sa maong lugar aron pagsiguro nga dili na masubli ang maong insidente.

Una niini gitug-an ni Lapu-Lapu City mayor Junard "Ahong" Chan nga ang maong lugar tapukan sa daghang mga batan-on panahon sa gabii tungod sa libreng WIFI nga gihatag sa kagamhanan.

Gipasabot ni Mayor Chan nga ilang gituyo nga kabutangan og libre nga WIFI ang maong lugar alang sa paggamit sa mga tinun-an sa mga research nga gikinahanglan sa ilang pagtungha. Si Chan misugyot nga himoon ang hugot nga pagbantay sa lugar panahon sa gabii aron malikayan nga masubli ang maong insidente. (BANAT NEWS)