Pagpasar sa Revised Real Property Tax ordinance malangay

CEBU, Philippines — Mas nalangay pa ang pagpasar sa giduso nga ordinansahong Revised Real Property Tax (RPT) diha sa Konseho sa Cebu City tungod sa mga pangutana sa base sa bag-ong valuation.

Niadtong Miyerkules, Abril 3, 2024, aprobahan na unta sa Cebu City Council ang revised RPT sa ikaduhang pagbasa tungod sa mosyon nga gipresentar sa author niini nga si Konsehal Noel Wenceslao, chairman sa Committee on Budget and Finance sa konseho sa dakbayan.

Apan atol sa diskusyon, si Konsehal Mary Ann de los Santos mipasaka hinuon og pangutana base sa bag-ong valuation o pagbanabana sa kantidad sa yuta o propiyedad nga pahamtangan og buhis.

 May I ask the proponent what is the basis of the new valuation?  pangutana ni de los Santos.

Gitubag kini ni Wenceslao ug nag ingon nga sa kinatibuk-an, ang revision sa RPT gibase sa kasamtangan nga Fair Market Value (FMV) nga gimando sa balaod.

 This a very valid observation of member delos Santos because I also asked our city assessor of the new valuation, and according to her this was recommended, the valuation was recommended by the independent appraisers and reviewed by the Philippine Valuation Standards,  sigun ni Wenceslao.

Hinuon giangkon ni Wenceslao nga sa dihang nangayo sila og pruweba, certification o rekomendasyon gikan sa mga independent appraiser ug sa Philippine Valuation standard, wala pa sila hatagi og mga kopya niini.

Sa usa ka text message sa The Freeman kagahapon (Biyernes), si Wenceslao niingon nga kinahanglan nilang balikon ang valuation una pa nila ipadayon ang pag-aprobar niini.

Dugang pa niya nga kinahanglan nilang siguroon nga ang valuation mao ang eksaktong kantidad sa FMV.

Gikataho nga si Cebu City Mayor Michael Rama nisubli sa iyang panawagan nga ipatuman ang rebisyon sa RPT nga nag-ingon nga ang siyudad gihikawan sa angay nga aktuwal nga kita gikan sa makolektang buhis.  IBM BANAT NEWS