Ilegal nga momuhatay og armas sikop

CEBU, Philippines — Nadakpan ang ilegal nga mamuhatay og armas human sa gipatuman sa kapolisan ang search warrant batok sa suspetsado diha sa Sitio Sapangdaku, Barangay Matija, Dakbayan sa Danao niadtong Martes sa kadlawon.

Ang maong search warrant giluwatan ni Regional Trial Court (RTC) Judge Ma. Josefa Pinza-Ramos sa Branch 90, Dakbayan sa  Danao.

Ang Provincial Intelligence Unit/Provincial Drug Enforcement Unit uban ang Danao City Police Station ug Regional Civil Security Unit-7 maoy nipahigayon sa pagpangronda ug nisikop sa 39-anyos nga lalaki kinsa residente usab sa lugar.

Giingong ang suspetsado ilegal kini nga nagtiner og mga ekipo alang sa pagbuhat og armas.

Nasakmit sa kapolisan gikan sa suspetsado ang usa ka kalibre .45 nga pistola nga dunay magazine, kalibre .22 nga revolver, upat ka lower receiver/frame, siyam ka steel magazine, 13 ka nagkalain-laing components sa armas nga wala pa ma-assemble, upat ka assorted metal scale, 20 ka assorted metal pieces, tulo ka units sa electrical post drill, tulo ka electric grinder ug pito ka metal vise.

Si Kapitan Joefel Gungon ug tanod niini nga si Gilber Lavado ang nisakmi sa maong pagpangronda sa kapolisan.

Ang suspetsado ubos karon sa kustodiya sa Danao City Police Station ug gikatakdang pasakaan og kasong kalapasan sa Akta Republika 10591 kun Comprehensive Firearms and Ammunition Regulation Act. (BANAT NEWS)