LWUA nagsugod na sa ilang imbestigasyon sa MCWD

CEBU, Philippines — Laing notice ang gipada sa Local Water Utilities Administration (LWUA) interim board ngadto sa Metro Cebu Water District (MCWD) board aron motuman sa ilang kasabotan sa paghatag kanila og access sa mga dokumento nga ilang gipangayo aron masugdan ang ilang imbestigasyon.

Sa usa text message, si Ronnie Ong, LWUA Chairman ug Interim chairman sa MCWD nagkanayon nga nagsugod na sila sa ilang partial intervention.

Matud niya nipadala sila og notice sa MCWD board niadtong Marso 21, 2024, alang sa turnover sa mga dokumento, ilabi na sa finances ug procurement.

Hinuon giklaro sa interim board sa LWUA nga buot lang nila nga magpadala og second notice subay sa kasabotan niadtong Marso 21,2024 diin ang MCWD niuyon nga hatagan og mga dokomento ang Interim Board sa LWUA.

Samtang si MCWD Chairman, Attorney Joey Daluz III niingon nga ang protocol nga ilang nasabotan sa LWUA mao nga mosuwat ang LWUA ug mangayo sa specific nga dokomento nga ilang gikinahanglan.

Si Daluz midugang nga ang ikaduhang notice mao ang labing una tungod kay wa sila makadawat sa unang notice.

“Remember they attempted to take over... but the mcwd declared a status quo and did not recognized them. I did not receive any notice but such is address to the managers of MCWD and not me,” suma pa ni Daluz.

Giklaro hinuon ni Daluz nga ang MCWD board dili mobalibad sa paghatag kanila sa mga dokumento kon ang LWUA interim board mosunod lang sa protocol.  Niadtong Marso 21, ang LWUA niinsistir sa ilang partial takeover sa policy-making body sa MCWD samtang ang kasamtangang MCWD board nagdumili sa pag step down ug pagpalig-on sa ilang status quo stance.

Lakip sa mga hinungdan nga gitumbok sa LWUA interim board nga nagtukmod sa ilang interbensyon mao nga adunay “breach” sa “obligations, promises and convenance” ubos sa Financial Assistance Contract.

Gawas niini, aduna sab mga isyu sa Commission on Audit (COA) findings, ug ang procurement nga kinahanglang adunay imbestigasyon.

Dugang pa, naalarma usab sila sa 70% nga pagtaas sa presyo sa tubig nga gihangyo ni Daluz ug iyang grupo sa LWUA. (BANAT NEWS)