Rama mopagawas og lista sa mga kandidato alang sa 2025 election
CEBU, Philippines — Si Mayor Michael Rama sa Dakbayan sa Sugbo mopagawas na unya sa lista sa ilang mga kandidato alang sa May 2025 election ubos sa Partido Barug.
Gibutyag ni Rama nga si Vice Mayor Raymond Alvin Garcia maoy iyang running mate samtang ang iyang konsehal sa south district ang kompleto ug aduna pay tulo ang bukas pa sa north district.
Matud ni Rama nga ang ilang survey nga gihimo makompleto na kini sa iyang pagbalik gikan sa iyang official business travel sa Taiwan.
Nasayran nga si Rama gikatakdang mobalik sa unang semana sa buwan sa Abril niining tuiga.
Si Rama nagkanayon nga ang mga kandidato gipaubos kini sila sa survey alang sa paglakip nila sa shortlist ug naghuwat siya sa resulta niini.
Gibutyag usab ni Rama nga ang iyang pag-umangkon nga si Kongresista Eduard Rama, Jr. subli nga magpapili sa south district samtang ang ngalan ni Konsehal Donaldo Hontiveros nilutaw sa north district.
Ang mga kaalyado ni Rama kinsa eligible nga modagan alang sa laing termino sa north district ang naglangkub nila ni Pastor “Jun” Alcover, Jr., Edgardo “JP” Labella II ug Noel Wenceslao. —/BDB (BANAT NEWS)
- Latest
