Lalaking mibitad og tinun-an nadakpan

CEBU, Philippines — Nadakpan sa kapulisan sa Dakbayan sa Naga ang 43 anyos nga lalake nga giingong mao ang nakuha sa CCTV footage nga gi-post sa Facebook ug nag-viral dihang matud pa kalit niini gibitad ang usa ka 12- anyos nga tinun-ang babaye atubangan sa usa ka restaurant sa Barangay East Poblacion, City of Naga.

Ang dinakpan nga 43-anyos nga construction worker, residente sa Barangay Matab-ag, Siyudad sa Toledo samtang ang biktima usa ka 12-anyos nga Grade 7 student nga taga Barangay Inayagan sa maong dakbayan.

Nahitabo ang insidente alas -4 sa hapon sa adlaw’ng  Biyernes, Marso 22,2024. Makita sa CCTV footage nga samtang galakaw ang dinakpan ingon man ang biktima kalit niining gibitad ang bata sa may pidpid nga bahin sa restaurant.

Pasado alas 10 sa gabie sa adlaw’ng Biyernes ang apohan sa bata personal nga miadto sa police station ug mi-report sa gihimo sa suspetsado sa iyahang apo tungod kay nalisang og maayo ang bata.

Human madawat ang impormasyon girespondehan dayon kini sa kapulisan sa dakbayan ug pasado alas 12 sa tungang gabii sa adlaw’ng Sabado, Marso 23 nadakpan ang suspetsado base sa kuha sa CCTV.

Sa impormasyon sa City of Naga Police Station nga  ang suspetsado gikan sa iyang trabahoan sa Barangay Lahug sa Cebu City nisakay kini og jeep pasaheroan ug ninaog kini sa maong restaurant kun asa nahitabo ang insidente.

Human matod pa makapaniudto niinom kini og ilimnong makahubog. Pag-abot sa alas 4 sa hapon galingkod-lingkod ang lalake tungod kay hubog unya niagi ang bata ug iyaha kining gibitad.

Apan kun ang suspek ang pangutan-on kini miingon nga wala na siya kahibalo sa iyahang gibuhat gumikan sa iyang kahubog.

Gumikan kay nadakpan mangayo kini og pasaylo sa biktima ug sa pamilya niini apan sigon sa kapulisan desidido ang habig sa pamilya nga  mopasaka og kasong kalapasan sa Republic Act 7610.— IBM BANAT NEWS