Kawani sa Cebu City hall naaksidente sa SRP

CEBU, Philippines — Nalandig sa tambalanan ang usa ka trabahante sa Cebu City Hall human kini nadisgrasya sa South Road Properties Bagsakan, kagabii adlaw nga Sabado.

Kini ang gibutyag ni Raquel Arce, ang pangulo sa Cebu City Transportation Office nga nahinabi sa Banat News kinsa maoy unang responder sa maong dapit. Sa social media post ni Arce ang trabahante sa DPS sa Cebu City Hall mao si Francisco Dela Cerna.

Matud pa ni Arce, ang maong biktima sakay kini sa sakyanan kuyog sa iyang pamilya kinsa igo ra niini gipapauli human sila gikan nangaligo og dagat sa dakbayan sa Naga. Gituohang nakainom ang biktima.

Sumala pa ni Arce, human niini nahatud ang iyang pamilya kinsa uban sa pagpangaligo og dagat sa ilang departamento, giingong nibalik kini kay gikuha ang iyang motor sa ilang trabahoan. Si Arce, nitug-an nga nakaangkon gayud og grabeng kadaut sa kalawasan ang biktima kini base sa impact niini ngadto sa sakyanan ug sa gimaneho niini nga motor hinungdan naa kini sa tambalanan.

Pipila sa mga nakasaksi sa maong dapit nitug-an nga giingong kusog gayud ang dagan sa maong biktima  ug sunod nilang nadungog ang kusog nga paka  ug nakit-an nga nagligdas na sa dalan ang biktima. – IBM BANAT NEWS