Luna sa Ciudad ugmaron ubos sa BOT
CEBU, Philippines — Ang lokal nga kagamahanan sa Probinsiya sa Sugbo hingpit na nga niturn-over sa bahin sa luna niini sa Banilad, Dakbayan sa Sugbo ngadto sa usa ka kompaniya nga maoy mo develop niini.
Kagahapon, si Gobernador Gwendolyn Garcia maoy nangulo sa pag-turnover sa Ciudad property sa Kapitolyo nga nahimutang sa dalan Gov. Cuenco Avenue, Banilad road sa Dakbayan sa Sugbo ngadto sa Filinvest Land Inc..
Ang 1.2 gikan sa 1.4 ka ektarya nga luna sa Ciudad maoy gi-turnover sa Kapitolyo ngadto sa Filinvest alang sa pagpalambo niini ubos sa Build Operate Transfer (BOT) scheme.
Ubos sa maong kasabotan sa Probinsiya ug Filinvest nga human mapalambo sa kompaniya ang maong property i-turnover kini ngadto sa Kapitolyo ug dayon mohatag ang Probinsiya og “exclusive right” o katungod sa Filinvest nga modumala sa maong property sulod sa 25 ka tuig.
Niadtong Enero karong tuiga, si Garcia ug ang presidente ug CEO sa Filinvest nga si Tristan Las Marias nipirma og lease agreement o kasabotan diin ang Probinsiya sa Sugbo makadawat og abang gikan sa kompaniya nga P65 matag metro kwadrado matag bulan ug adunay escalation o pagsaka nga 5 porsyento matag tuig.
Mobayad usab ang FLI ngadto sa probinsiya og 2 porsyento sa gross sales o P200, 000 matag bulan.
Pinaagi niini gipaabot nga madugangan ang panudlanan sa Probinsya sa Sugbo.
Samtang si Bokal Glenn Anthony Soco, chairman sa Committee on Trade and Commerce nagkanayon usab nga ang kita sa probinsiya gikan sa maong proyekto mahimong gamiton sa Kapitolyo sa pagpatuman og mga programa ug proyekto sa lalawigan. — BDB BANAT NEWS
- Latest