Lillard mi-agak sa Bucks

CEBU, Philippines — Si Damian Lillard mibubo og 13 sa iyang 30 puntos sa katapusang kuwarter ug dayon mibira og duha ka krusyal nga steals aron agakon ang Milwaukee Bucks ngadto sa 115-108 nga pagpakaging sa Brooklyn Nets sa NBA kagahapon didto sa Fiserv Forum sa Milwaukee, Wisconsin. Ang duha ka steals ni Lillard miresulta sa sunod-sunod nga 3-pointers nilang Giannis Antetokounmpo ug Malik Beasley sa wala pa siya milansang sa kaugalingon niyang tres aro paghatag sa Bucks og dili na maapsan pang 10 puntos nga labaw sa pinal nga 41 segundos. Gawas sa mainit niyang opensa, si Lillard mipasa sab og 12 ka assists.  Si Antetokounmpo nagparamdam dayon sa iyang pagbalik human makapalta og duha ka duwa pinaagi sa pagtali og 21 puntos, siyam ka rebounds, ug lima ka assists.

Sa laing bahin, ang defending champion Denver Nuggets padayong miratsada uban ang 113-100 nga pagparot sa New York Knicks, samtang si Luka Doncic ug ang Dallas Mavericks mihimo og impresyon sa 113-97 nilang paglampornas sa Utah Jazz.

Si Michael Porter Jr. maoy nangu sa Nuggets bitvit ang 31 puntos samtang si Nikola Jokic miposte sa ika-22 niyang triple-double ning season uban ang 30 puntos, 14 ka rebounds, ug 11 ka assists.

Didto sa Dallas, si Doncic mipupo og 34 puntos, siyam ka rebounds ug walo ka assists alang sa Mavs nga mirehistro og 18 ka dunks dayon na ngadto sa pagkab-ot sa ikatulo nilang sagunson nga daog.