Nang-scam og delivery rider sikop

CEBU, Philippines — Nadakpan sa kapolisan sa Mambaling Police Station ang usa ka 44-anyos nga lalaki human giingong nang-scam og usa ka delivery rider.

Ang suspetsado mao si Greman Louise Malinao, residente sa Barangay Bagay, Lungsod sa Daanbantayan samtang ang biktima usa ka 25-anyos nga delivery rider nga nagpuyo sa 115 Visitacion Street, Barangay Sambag 2, Siyudad sa Sugbo.

Matud ni Police Major Jonathan Bethooven Taneo, hepe sa Mambaling Police Station nga ang suspetsado ni-book sa biktima nga ipahatud niini ang ilimnong makahubog nga nagkantidad og P1,200 nga gi-order gikan sa iyaha.

Niabuno sa iyang kaugalingong kwarta ang delivery rider isip bayad sa item ug sa paghatud niini sa item sa dapit nga giingon sa suspetsado nga adto ihatud  gumikan kay walay buyer nga nidawat sa item. Apan ang suspetsado mao usab diay ang buyer kunohay sa item.

Ug gumikan kay wala man nidawat sa item nagduda na ang delivery rider maong iyahang giablihan ang item ug nasuta niya nga giablihan na ang botilya sa ilimnong makahubog unya tubig na ang sulod niini.

Gi-trace sa delivery rider ang suspek diin diha kini nadakpan sa may I.T Park sa kapolisan sa Mabolo Police Station apan gumikan kay nahitaboan ang insidente sakop sa Mambaling Police Station hinungdan nga sila ang mosang-at og kasong estafa batok sa suspek.

Nasayran nga notado na sa ingon niini nga modus ang suspek ug giingong aduna kini laing kuyog.  (BANAT NEWS)