Rama nitambong sa tigom sa Smart Cities

CEBU, Philippines — Si Mayor Michael Rama sa Dakbayan sa Sugbo ang nilarga sa kaulohan dayon ngadto sa Kaohsiung City sa nasud sa Taiwan.

Kagahapon si Rama atoa sa kaulohan alang sa pagtambong sa usa ka tigom sa Smart Cities nga tambongan sa tanang mayor sa siyudad lukop nasud.

Matud ni Rama nga human sa iyang tigom sa smart cities iyang dalhon ang maong natuki nila ngadto sa 2024 Smart City Summit and Expo: Digital and Green Transformation nga himuon sa Taiwan gikan Marso 19 ngadto sa 22, 2024.

Gibutyag ni Rama nga morepresentar siya sa pinakaimportante nga panagtigom ug kataposan usab niyang nakataak sa nasud sa Taiwan ug Kaohsiung City niadtong bise mayor pa siya sa tuig 1992 o 1993.

Matud usab ni Rama nga dako og tabang sa Dakbayan sa Sugbo ang Kaohsiung human nidonar kini og mga bus ug nagpasulod isip direct hiring og mga Overseas Filipino Workers gikan sa Sugbo. Giawhag ni Rama nga ang mga Sugbuanon sa paglakip kanila sa pag-ampo nga malamposon ang ilang biyahe. (BANAT NEWS)