87 ka tonelada nga basura nahipos sa Citywide Cleanup

CEBU, Philippines — Moabot ngadto sa dili mominos 87 ka tonelada nga basura ang nahipos atol sa gipahigayon nga ika-15 nga Cebu Citywide Cleanup Challenge niadtong Sabado sa Dakbayan sa Sugbo.

Matud pa sa pangulo sa Department of Public Services John Paul Gelasque, gatusan ka mga volunteers nga naglakip sa mga trabahanti sa City Hall ug mga barangay ang nisalmot sa kalihukan.

Ang maong mga basura nagagikan sa Guadalupe River; Lahug River; Kinalumsan River; Mahiga River; Butuanon River; Bulacao River; Tagunol River ug Estero de Parian.

Sumala pa ni Gelasque, mga representante sa nagkadaiyang pribadong sektor, ahensya sa gobierno, NGO ug uban pa ang nisalmot usab.

Si Mayor Michael Rama sa Dakbayan sa Sugbo, niawhag sa mga nanambong sa maong kalihukan diha sa SRP nga isulod gayud sa kasing-kasing ang ilang gihimo og dili kutob lang sa pagpahulagway.

Nangulo sa maong kalihukan ang Cebu City Environment and Natural Resources Office ug Coastline Management Board. (BANAT NEWS)