Manaygonay nga manapat og pasaherong di mohatag gidakop

CEBU, Philippines — Nadakpan sa City Intelligence Unit (CIU) sa Cebu City Police Office (CCPO) ang 18-anyos nga batan-on nga unang nag-viral sa social media nga manapat matud pa sa mga pasahero kung dili hatagan og kwarta human sa pagpanaygon niini sa jeep de pasaheroan tungod kay gi-alarma kini nga armado diha sa dalan Leon Kilat, Barangay Kalubihan, siyudad sa Sugbo, alas 1 sa kadlawon sa adlaw’ng Domingo, Marso 10, 2024.

Ang dinakpan mao si Arvie Cuerbo, 18 anyos, wala’y klarong address. Kahinumduman nga si Basak Pardo Barangay Captain miimbitar sa maong batan-on, niadto kini sa Barangay Hall ug misaad nga dili na niya usbon ang maong binuhatan.

Apan paglabay sa pila ka adlaw nakaabot sa Kapitan nga naa na sab kini laing gibiktima ug wala motuman sa iyahang gisaad.

Nahibaw-an sab nga giusab sa batan-on ang iyahang rota sa pagsakay og jeep,  kaniadto mosakay kini og jeep pasaheroan gikan sa South District sa Cebu City paingon sa dalan Colon apan karon gikan sa dalan Colon paingon na kini sa North District sa siyudad.

Ang maong binuhatan sa batan-on nakaabot sa atensyon sa kapulisan sa Siyudad sa Sugbo hinungdan nga ilahang gi-monitor ang maong lihok sa maong batan-on.

Matud ni Police Lieutenant Colonel Janette Rafter, Deputy City Director for Operations sa Cebu City Police Office ang mga personnel sa CIU dunay gilakaw sa dalan Leon Kilat, Barangay Kalubihan dihang dunay mi-report sa ilaha labot sa tawo nga armado.

Daling girespondehan sa kapulisan ug didto nasuta nga ang gialarma nga armado kay si Cuervo nga nag-viral sa social media gumikan sa iyahang gihimo. Nakuha gikan sa dinakpan ang calibre .38 nga revolver nga dili lisensyado.

“Ang iyahang claim adto gikan daw sa iyahang amigo, which we are trying to look at pud karong panahona and then we are trying to verify gyud kung unsa ka tinood, sa iyahang amigo or iyaha ra tong claim but again it was caught on his possession,” ni Rafter pa.

Sa pakighinabi sa mga tigbalita kang Cuervo kini miingon nga nagdala siya og armas pang  depensa sa iyahang kaugalingon human siya nag-trending sa Facebook ug giingong dunay gustong mopatay niya.

Hinatag ra matod pa ang maong armas sa iyahang amigo ug kini miingon nga wala pa siya nakapusil, nakit-an matud pa siya nga nagdala og armas kay nawalis ang iyahang sinina.

Nagkanayon sab kini nga nadala ra siya sa iyahang kagutom dihang nanamak siya sa tiil sa mga pasahero.  “Mangayo lang ko og pasensiya hinaot dili na sila maglagot nako ba nadakpan naman ko,” matud ni Cuervo.  Sa gihimong pakisusi sa kapulisan ang maog batan-on daghan og address sa Cebu City sama sa Subangdaku, Mabaling ug sa Ermita.

Nahibaw-an sab nga nadakpan na kini kaniadto sa Police Station 5 sa kalapasan sa paghupot ug pagpamaligya og illegal nga drugas.— IBM BANAT NEWS