Aksyon Agad Team nitabang na paghatud og tubig

CEBU, Philippines — Nitabang na sa paghatud og rasyon nga tubig ang mga sakop sa Aksyon Agad Team ngadto sa bukirang barangay sa Dakbayan sa Talisay. Kini aron lang matubag ang panginahanglanon nga tubig sa Barangay Tapul ug Jaclupan.

Ang kagamhanan sa siyudad nagsugod na sa pagrasyon og tubig niadtong buwan sa Enero niining tuiga sa Barangay Maghaway, Manipis, Tapul ug Jaclupan. Si Gary Togonon, pangulo sa Aksyon Agad Team nibutyag nga karon lang semanaha sila nakahatud og tag 2,000 ka litro nga tubig ngadto sa nahisgutang mga barangay.

Ang mga residente sa lugar adunay ilinya nga  mga balde ug container gawas sa ilang panimalay nga sudlan sa tubig inig abot sa rasyon.

Si Alvin Santillana, pangulo sa City Disaster Risk Reduction and Management Office nagkanayon nga ila unang giobserbahan ang paggamit sa mga barrel aron masuta ang ka epektibo niini.Ang ilang paghatag og rasyon nga tubig himuon na nila nga kaduha o katulo sa matag semana aron matubag ang kinahanglan nga tubig sa mga residente.

Ug paningkamotan usab nila nga dili makompromiso ang paggamit sa tanker gumikan kay motubag usab kini kong adunay alarma sa sunog. BDB BANAT NEWS