Tree lighting  nga gihimo tunga sa karsada imbestigahon

CEBU, Philippines — Traffic Management Coordination Committee nga gipangulohan ni Konsehal Rey Gealon, mohimo og imbestigasyon sa reklamo niadtong Domingo sa gabii kabahin sa tree lighting nga gipahigayon sa Barangay Bulacao, nga diha sa tunga-tunga sa highway nga niresulta sa grabing ka traffic.

Matud pa ni Gealon, walay application alang sa paggamit sa dalan nga niabot sa buhatan sa TMCC alang sa ilang konsiderasyon.

Nagpakisayod usab siya sa CCTO Head nga si Raquel Arce kabahin sa maong kalihukan apan wala usab kini kasayuran sa uban pa nga mga detalye, hinungdan iyaha kini gisusi aron personal nga makita ang reklamo.

Nasaksihan gyud sa konsehal ang grabe nga kahuot sa traffic diin diha sa tunga ang kaon-kaon samtang nangagi lang ang mga apektado nga motorista. Subay niini ang kapitan sa Barangay Bulacao, Dakbayan sa Sugbo nangayo og pasaylo subay sa maong viral nga video.

Ang bag-ong kapitan nga si Junah Abellanosa, nangayo og dispensa sa viral post sa usa ka netizen nga nahasol sa grabeng kahuot sa trapiko tungod sa gipahimutang nga kan-anan tunga sa dalan. Matud pa sa kapitan ang maong kalihukan iya sa Pasko sa Dakbayan nga gipasiugdahan sa City Government diin igo lang sila nihatag og suporta niini tungod kay anaa man sa ilang barangay ang pagpasiga sa Christmas Tree.

Dugang pa sa kapitan nakurat nalang siya sa dihang pag abot niya sa maong dapit aduna nay gimontar nga mga lamisa sa karsada ug giingong aduna na kini koordinasyon sa Cebu City Transportation Office.

Andam ang kapitan nga moatubang sa higayon nga ipatawag para sa himoon nga imbestigasyon aron mahatag usab niya ang katin-awan.

Apan ang pangulo sa CCTO nga si Arce nipadayag nga ang gi coordinate sa ilang buhatan mao ra ang pagpasuga sa Christmas Tree maong aduna silay gipahimutang nga mga CCTO Personnel aron sa pag manage sa traffic.

Kun nasayod pa sila nga aduna kini kaon-kaon sa karsada dili gayud kini nila hatagan og pagtugot tungod kay dako kini nga kalapasan sa lagda sa trapiko. Ang Organizer sa Pasko sa Dakbayan sa Sugbo, wala pa mohatag sa ilang reaksyon may kalabutan sa maong nag viral nga video. (BANAT NEWS)