Kaluha nangalumos sa swimming pool

CEBU, Philippines — Patay ang duha ka 5- anyos nga kaluhang lalaki human sila nangalumos  sa swimming pool sa usa ka subdivision diin sila magpuyo sa Barangay Gabi sa Lungsod  sa Cordova.

Si  Police  Major  Michael  Gingoyon, hepe sa Cordova Police Station miingon nga gikatahong nahitabo kini alas-3 pasado ang takna sa hapon sa miaging Domingo apan alas-6 na sa gabii gipahibalo kanila.

Ang kaluha nga mao sila si Dickson ug Patrick Sarmiento. Ang duha gikatahong nagduwa og bola duol sa swimming pool apan sa ilang pagitsa-itsa nalagpot kini sa swimming pool.

Matud pa wala mabantayi sa mga hamtong nga kabanay ang duha nga miadto sa pool aron kuhaon ang bola diha sa tubig apan nangalumos sila.

Gitabang na sa mga emergency medical service sa Municipal Disaster Risk Reduction and Management Office (MDRRMO) ang duha apan pagabot sa tambalanan nakabsan na sila og kinabuhi. (BANAT NEWS)