Dunay midaog nga kandidato sa BSKE nga nalambigit sa drugas?
CEBU, Philippines — Mohimo og pakisusi ang Philippine Drug Enforcement Agency (PDEA)-7 og monitoring kun dunay mga midaog sa Barangay ug Sangguniang Kabataan Elections 2023 nga nalambigit sa illegal nga kalihukan sama sa drugas.
Matud sa tigpamaba sa PDEA-7 Leia Alcantara nga ang mga indibidwal nga naa sa posisyon ug makaimpluwensiya gyud sa mga tawo sa opinyon nga ilang ipagawas gikonsiderar nila nga high value targets.
Sa personal nga kasayuran ni Alcantara , dunay duha ka kandidato sa Central Visayas nga tiggamitan og illegal nga drugas sama sa shabu apan pulos kini napildi.
Nagtuo si Alcantara nga nasayod na ang mga silingan nila sa barangay nga tiggamitan sila og illegal nga drugas nga gituohang maoy hinungdan nga wala sila makadaog sa piniliay.
“Ako na i-double check sa intelligence kay as of today wala koy update, ang akung nahibal-an gyud naay katong nidagan napildi, unfortunately napildi sila,” sigon ni Alcantara.
Magpadayon ang tinguha sa PDEA-7 nga malimpyo sa illegal nga drugas ang tanang barangay sa Central Visayas ug angayan nga magsugod kini sa mga elected officials. (BANAT NEWS)
- Latest