Usa patay, lima angol human ni-counter flow ang modern jeep
CEBU, Philippines — Patay ang usa ka call center agent samtang lima ang angol human ang usa ka modern jeep nawagtangan og control dihang ni-counter flow kini sa may Corner MC Briones ug Labogon Road, Barangay Basak, Dakbayan sa Mandue niadtong Martes sa gabii.
Ang biktima taga Lungsod sa Compostela ug ang kompaniya nga gitrabahoan niini nagbase sa Dakbayan sa Sugbo.
Samtang ang modern jeep driver, usa ka 38-anyos, ulitawo, taga Barangay Jubay, Lungsod sa Liloan.
Base sa imbestigasyon sa kapolisan giingong ang modern jeepney nagbiyahe padulong sa Lungsod sa Consolacion ug pag-abot diha sa lugar nga nahitaboan nisuway kini og overtake sa nagbiyahe nga sakyanan sa laing direksiyon o ni-counter flow. Atol sa pag-counter flow sa maong modern jeep nawagtangan kini og control sa iyang gimaneho nga sakyanan ug nakaigo kini og auto nga nag-parking diha sa kilid sa dalan.
Ug gumikan sa ka kusog sa impact natumba ang maong sakyanan nga niresulta sa kamatayon sa usa ka call center agent ug niangol sa lima ka pasahero nga anaa karon sa Mandaue District Hospital.
Ang drayber sa modern jeep natingkagol karon sa detention cell sa Police Station 3 sa Mandaue City Police Office. (BANAT NEWS)
- Latest