Visayan Electric mopausbaw og P0.58 sa bayranan sa kuryente

CEBU, Philippines — Makasinati og usbaw nga P0.58 matag kilowatt hour (kWh) ang mga konsumidor sa Visayan Electric residential sa buwan sa Nobiyembre.  Ang maong pagsaka  nagdala sa kasamtangang rate ngadto sa P12.59/kWh gikan sa P12.01/kWh sa niaging buwan.

Kini ang unang higayon sulod sa pito ka buwan nga ang Visayan Electric mopatuman og usbaw sa average rate sa residential consumers.

Gikatahong resulta kini sa taas nga "line rental" rate nga mahitabo kong adunay paghuot sa mga linya sa transmission.

Ang usa ka panimalay nga adunay average nga konsumo nga 200 kWh k makasinati  og usbaw nga labing menos P116 sa ilang sunod nga bayranan sa kuryente.

Taliwala sa pagsaka sa bayranan sa kuryente ang presidente ug chief operating officer sa Visayan Electric Raul Lucero nagpahinumdom sa mga konsumidor nga magdaginot sa kuryente.

“The holiday season is fast approaching and I would like to remind our consumers to be extra mindful of appliances, especially when planning to buy one for the holidays, please consider those that are energy efficient”, matud ni Lucero .

Kinahanglan nga dili magpalabi sa paggamit sa appliances aron dili makugang sa bayranan sa kuryente.

Sa laing bahin,  gipalapad sa Visayan Electric  ang  serbisyo ilabi  na sa  pagbayad sa bill human  gibuksan na ang ilang D. Jakosalem Service Center sa downtown sa Dakbayan sa Sugbo.

Ang maong center moabi-abi alang sa service applications, reconnections, account upgrade or downgrade, pagpa-enroll sa eBillTXT, MobileAP, Senior Citizen discount, Lifeline Subsidy ug bill payments.

Abli kini gikan sa  sa Lunes hangtud Sabado gikan sa alas 9:00 sa buntag hangtud sa alas 6:00 sa gabii. (BANAT NEWS)