Birthing Center gibuksan sa Pahina San Nicolas
CEBU, Philippines — Gibuksan niadtong Martes sa Cebu City Health Office ang Maternal Birthing Center o paanakan diha sa Barangay San Nicolas Proper nga nahimutang sa ground floor sa barangay hall, diin susama og usa ka hospital ang set-up.
Ang maong paanakan adunay check-up room hangtud na sa labor ug recovery room diin hapsay ug limpyo ang mga katre ug airconditioned ang kwarto ingon man kompleto sa kahimanan.
Sumala pa ni Dr. Daisy Villa ang pangulo sa Cebu City Health Department nga bukas kini alang sa tanan nga normal delivery diin adunay mga midwives nga moatiman apan adunay mga doctor nga matawagan kun gikinahanglan.
Ang maong birthing center maoy ika-onse na nga ilang gibuksan human nag-una niini ang Mabolo, Talamban, Carreta, Guadalupe, Inayawan, Quiot,Tejero, Pasil, Sudlon II, Lahug ug San Nicolas Proper, samtang on process karon ang barangay Cambinocot.
Gitug-an ni Villa, kung makahimo ang 80 ka barangay og Maternal Birthing Center, mas labing maayo kay dako kining tabang nga mahimo ra diha sa barangay manganak ang kababayen-an ilabi na ug normal delivery lang.
Alang kang Kapitan Clifford Jude Niñal, dako kaayo kini og ikatabang sa ilang mga constituent ilabi na kadtong walay ikasarang sa paggasto sa ilang pagpanganak.
Ang Barangay Maternal Facility bukas kini dili lang sa mga molupyo sa barangay apan lakip usab ang silingan nga dapit nga nagkinahanglan. (BANAT NEWS)
- Latest