Wala mailhing lalaki gipusil patay sa wala mailhing criminal

CEBU, Philippines — Padayon pa nga gisuta sa kapolisan sa Sawang Calero Police Station 6 ang identity sa usa ka lalaki kinsa gipusil patay diha sa Katipunan Street corner A. Lopez, Barangay Calamba, Siyudad sa Sugbo kagahapon sa hapon.

Base sa report sa Sawang Calero Police Station nga ang biktima nagsul-ob og blue nga t-shirt, faded shorts pants, fair complexion ug gibana-bana nga nagpangedaron og 40- anyos, 5'4 ang gitas-on sa pamarog niini,

Giingong dihang naabot sa dalan Katipunan ang maong lalaki kalit lang kining gipusil  sa wala mailhing kriminal kinsa nagsul-ob og puwa nga jacket ug daling nisibat human sa pagpamusil.

Ang biktima nakaangkon og samad pinusilan sa walang bahin sa iyang gusok.

Giingong kalibre.9mm nga pistola ang gigamit sa pagpusil sa suspetsado ngadto sa biktima diin na-recover sa mga polis gikan sa lugar nga nahitaboan ang kabhang sa bala sa maong kalibre sa armas.

Wala nay kinabuhi ang biktima nga naabtan sa personnel sa EMS Medical Team kinsa niresponde sa insidente.

Ang kapolisan sa Sawang Calero Police Station 6 nihimo karon og follow up operation pag-ila sa biktima ug sa criminal.

Gisubay usab sa kapolisan ang footage sa closed circuit television (CCTV) diha sa lugar. — /BDB (BANAT NEWS)