PWD ilegal nga naghupot og armas sikop

CEBU, Philippines —  Nasikop sa Criminal Investigation and Detection Group Cebu City Field Unit pinangulohan ni Police Lieutenant Colonel Randy Korret ang usa ka person with disability tungod sa ilegal nga paghupot niini og armas niadtong Huwebes sa hapon diha sa Barangay Busay, Dakbayan sa Sugbo.

Dala sa kapolisan ang search warrant nga giluwatan ni Regional Trial Court (RTC) Judge Marlon Jay  Moneva sa Branch 74 batok kang Jimmy Modina, hingkod ang panuigon, walay trabaho, nagpuyo diha sa Plaza Ville Subdivision sa nahisgutang barangay. Nasayran nga ang pikas mata sa suspetsado medyo hanap na kini og panan-aw. Matud sa kapolisan nga ang subject sa search warrant gikatahong naghupot og walay lisensiya nga armas ug mga bala. Ang suspetsado giingong makadaghang higayon na nga nagpakita sa iyang armas ngadto sa iyang mga higala atol sa ilang inom ug usahay manghasi sa mga nag-abang sulod sa compound nga iyang gipuy-an.

Giingong adunay daghang reklamo nga gisang-at diha sa ilang barangay batok sa suspetsado ug lakip ang pamilya niini kinsa ang iyang mga ginikanan mga tigulang na hulagaon niya nga patyon kong dili mohatag og kwarta.

Gikataho nga ang suspetsado nagumon kini sa ilegal nga drugas ug palahubog usab kini. Niadtong tuig 2018 ang suspetsado gireklamo kini og kalapasan sa municipal ordinance/ harassment; 2019, gireklamo kini og alarm and scandal; pagka-tuig 2020 gireklamo og light threats sa samang tuig laing reklamo kabahin sa public health concern;  2021, gikasohan og slight physical injury ug maltreatment human niya bunali og bato ang ulo sa iyang amahan ug ilegal nga paghupot og armas. Giingong ang suspetsado unom ka higayong napriso ug kataposang priso niini niadtong tuig 2021 tungod sa ilegal nga paghupot og armas ug niadtong buwan sa Hulyo niining tuiga lang nakagawas gikan sa prisohan. 

Atol sa pag-implementar sa search warrant nasakmit sa mga polis ang duha ka revolver nga adunay tulo ka bala ug usa ka kalibre .45 nga pistol nga adunay pito ka bala. BDB (BANATNEWS)