Rehabilitasyon sa Mahiga Creek masugdan na

CEBU, Philippines —  Magpadayon subay sa plano ang rehabilitasyon  sa Mahiga Creek human nga nagahinan na kini karon og pundo. Sa miaging buwan, sila si Cebu City Mayor Michael Rama ug Mandaue City Mayor Jonas Cortes nagkasabot nga magtinabangay aron buhion pagbalik ang maong sapa nga naa sa utlanan sa duha ka siyudad.

Atol sa consultative meeting sa duha ka siyudad, ang Department of Public Works and Highway (DPWH)-Region 7 Engr. Faustino dela Cruz Jr. miingon nga duna na silay gigahin nga pundo para sa maong proyekto.

Kini tungod kay nakita nga usa kini sa hinungdan sa paglunop sa tubig baha sa duha ka siyudad kun mobunok og maayo ang uwan.

Si Engr. Dela Cruz gikatahong personal nga mosusi sa maong sapa para sa duha aron masugdan na ang pag-ila ug pagberipika kun kinsa ang mga maapektahan sa 3-meter easement recovery.  Ang pangulo sa Department of Environment and Natural Resources(DENR)-Mines and Geosciences Bureau (MGB), Paquito D. Melicor Jr., mipadayag sab nga andam silang motabang pagsulbad sa problema. Hatagan nila og kopya ang DPWH-VII sa “shapefile” sa Mahiga river ugmang adlawa (Oct.16) aron dili magkagubot kun kang kinsa o kinsay tagiya sa mga yuta sa kilid sa maong sapa. Ang maapektahang mga residente  ipatawag karong Nobiyembre 25 ug 26 sa mga LGUs. Ang Mandaue ug Cebu Cities nagkasabot nga sila maoy unang mokubkob sa maong sapa isip dinaliang solusyon sa pag-awas niini.

Sa pikas bahin,  ang bag-ong pangulo sa Cebu City CCENRO, Reymar Hijara, misugyot nga buhion og balik ang Barangay Ecological Solid Waste Management Council ini og mahuman na ang eleksyon ning buwana. (BANAT NEWS)