Mga batan-on mao nay gigamit sa mga sindikato sa drugas
CEBU, Philippines — Sikop ang 21-anyos nga batan-ong lalake sa buy-bust operation sa Police Regional Drug Enforcement Unit sa Police Regional Office-7 alas 12 kaadlawon sa adlaw’ng Biyernes sa Sitio Campar, Barangay Poblacion Pardo, siyudad sa Sugbo.
Giila ang dinakpan nga si Manuel Ace Delgado Causing alyas Teban, 21 anyos, usa ka High Value Individual, residente sa Upper Galilee, Barangay Duljo Fatima, ning siyudad.
Si Causing nakuhaan og 1,300 grams nga shabu nga mobalor og P8.4 million. Sa impormasyon sa kapulisan ang dinakpan maka dispose og tulo ka kilong shabu kada semana.
Matod pa ang contact person niini naa sulod sa Cebu City Jail ug ang iyahang operasyon dili lang Cebu City apan apil na ang Mandaue ug Lapu-Lapu City.
Nabantayan nga sagad sa mga nadakpan sa anti-illegal drug operations mga batan-on ug sigon ni Police Lt. Col. Gerard Ace Pelare tigpamaba sa PRO-7 nga pamaagi kini sa sindikato aron dili ang ilang importanteng mga miyembro maoy madakpan.
Matud ni Pelare, gikan sa bulan sa Enero hangtud Septiyembre 3 ning tuiga nakasakmit na sila og balor P700 milyones nga balor sa ilegal nga drugas.
Sa pikas bahin, laing 20-anyos nga usa ka Jhon Lemuel Bensulan nga taga Sitio Elmayana, Barangay Pardo, Siyudad sa Sugbo ang nadakpan sa buybust operation sa kapolisan sa Dakbayan sa Talisay niadtong Huwebes sa gabie diha sa Purok Gumamela, Barangay San Roque.
Nakuhaan kini og lima ka gramong gidudahang shabu.Giingong street level pusher si Bensulan. — Romeo D. Marantal ug Gabriel Bonjoc, IBM (BANATNEWS)
- Latest
