Nagbakasyon lang kadtong sakop sa Sinaloa drug Cartel sa San Remigio

CEBU, Philippines — Nasuta nga nagbakasyon lang sa Lungsod sa San Remigio ang Most Wanted Person sa nasud nga Indonesia ug naa sa “red notice” sa Interpol, uban ang iyahang live-in partner dihang nadakpan kini sa Bureau of Immigration niadtong Miyerkules, Mayo 15.

Ang gidakop mao sa Bureau of Immigration nai si Gregor Johann Haas, 49,  nga us aka Australyano diha sa gawas sa gipuy-an niining apartment sa Barangay Poblacion sa maong lungsod.

Giangkon ni Police Captain Phil Restauro, hepe sa San Remigio Police Station nga nakurat sila nga dakong personalidad ang ilang gidakop kauban ang mga ahente sa Bureau Immigration.

Gikatahong nga miyembro sa Mexican Sinaloa Drug Cartel ang dinakpan ug duna kini kaso nga pagpalusot og ilegal nga drugas sa Indonesia nga gipatuong floor ceramics apan sa sud diay niini lima ka kilong metamphetamine nga ilegal nga drugas.

Nasuta sab nga duha ka semana ng nagpundo sa maong dapit ang dinakpan ug posible nga gimonitor na ang mga lakaw niini maong dihang nahibaw-an nga nasigpatan kini sa lugar ayha pa gihimo dayon ang operasyon.

Sumala pa sa report sa Philstar.com, ang mga otoridad sa Indonesia miingon base sa nakuhang mga testimonya gikan sa mga una nilang nadakpang drug couriers ni Haas, ang maong drug package pinadala kini ni Haas gikan sa Guadalajara, Mexico.

Ang Sinaloa drug cartel nagsugod sa Sinaloa Region sa Mexico niadtong dekada 80. Sila karon maoy usa sa pinakadako nga drug trafficking organization sa tibuok kalibotan.

Si Justice Secretary Jesus Crispin Remulla midayeg sa pagkasikop sa maong langyaw.

Si Haas gidala na sa Camp Bagong Diwa sa Taguig City samtang gihikay na ang deportasyon kaniya ngadto sa Indonesia. (BANAT NEWS)