Seguridad sa mga politiko, estudyante gibantayan sa LLCPO

CEBU, Philippines — Ang Lapu-lapu City Police Office padayon nga nag-monitor sa mga politiko kinsa ilang gihulagway nga target personalities ilabi na sa nagsingabot nga Barangay ug Sangguniang Kabataan elections sa Oktubre 30, 2023.

Matud ni Police Colonel Elmer Lim, direktor LLCPO nga ang ilang gihimo mao ang pagprotihir sa mga politiko ilabi na kadtong mga nakadawat og hulga.

Ang mga politiko sa ilang area nga adunay hulga gihatagan nila og seguridad nga adunay pagtugot sa Commission on Elections ug Police Regional Office-7.

Si Lim niawhag sa mga politiko nga nakadawat og hulga nga moduol sa ilang buhatan aron mahatagan sila ug protection ilabi na nga hapit na ang election.

Matud usab ni Lim nga patrolyahan nila ang mga panimalay sa mga politiko nga nakadawat og hulga.

Padayon usab ang LLCPO sa pakig-alayon sa Comelec sa pagpahigayon sa checkpoints samtang nagkaduol ang elections.

Sa laing bahin, nakig-alayon ang LLCPO sa mga principal aron sa pagtabang nga mapugngan ang mga tinun-an nga ma-recruit sa mga gang ug fraternities.

Ang klase sa pampublikong tunghaan gibuksan na niadtong adlaw’ng Martes.

Gibutyag ni Lim nga adunay mga magtutudlo nga concern sa ilang mga tinun-an nga ma-recruit sa mga gang ilabi na human sa klase.

Ang kapolisan sa siyudad nihatag og numero sa telepono o cellphone nga ilang matawagan kong nagkinahanglan kini og panabang sa mga polis.

Gimandoan usab ni Lim ang sub-station commanders nga magpatrolya sa tunghaan aron masiguro ang seguridad sa mga tinun-an human sa ilang klase.

Adunay mga gi-detail nga polis alang sa seguridad sa mga eskwelahan. (BANAT NEWS)