Tabo sa kapitolyo sugdan karong Agosto 1
CEBU, Philippines — Sugod karong Agosto 1 adlaw nga Martes, ipahigayon na usab ang tinuig nga Tabo sa Kapitolyo sa Probinsya sa Sugbo.
Subay kini sa usa ka bulan nga selebrasyon sa kasumaran sa Probinsya o ang ika- 454 nga Founding Anniversary.
Ang maong agro-trade fair molungtad og usa ka semana o gikan Agosto 1 hangtud Agosto 6 kon diin ang matag lungsod ug siyudad lukop Probinsya sa Sugbo mopakita ug mobaligya sa nagkadaiyang mga utanon o produkto sa agrikultura ug mga delicacies nga ilang gipasigarbo sa ilang lungsod.
Gawas sa mga LGUS makadisplay usab og mga produkto ang mga gipili nga micro, small and medium entrepreneurs.
Ang tabo sa Kapitolyo anha ipahimutang sa Capitol Grounds diin buksan kini karong umaabot nga Martes human sa flag raising ceremony sa Kapitolyo.
Si Governor Gwen Garcia gipaabot nga maoy mangulo sa kalihukan uban ni bise gobernador Hilario Davide III, mga bokal, department heads sa Kapitolyo, mga Mayor sa Probinsya ug uban pang mga lokal nga opisyal sa Sugbo. (BANAT NEWS)
- Latest