101 ka minors nasikop sa siyudad sa Lapu-Lapu
CEBU, Philippines — Mokabat sa 101 ka minor de edad ang nasikop sa gihingusgan nga pagpatuman sa curfew ordinance sa kapolisan sa siyudad sa Lapu-Lapu.
Ang maong gidaghanon naggikan sa lima ka presinto sa Lapu-Lapu City Police Office (LCPO) nga nagpahigayon og mga pagpatrolya panahon sa kagabhion
Si Police Colonel Elmer Lim, director sa LCPO ang miluwat og kamandoan sa paghingusog sa pagpatuman sa curfew ordinance sa siyudad tungod sa namatikdan nga pagsiaw sa mga nagpabadlong nga mga minors nga naglakip sa pagsulod og mga gang nga moresulta sa panagrambol, pagpangawat ug uban pa.
Giatubang sa kapolisan kauban sa mga personnel sa City Social Welfare ug giisyuhan og citation ticket ang mga batan-on.
Kusganon karon nga nagpahimangno ang kapolisan ngadto sa mga ginikanan nga dili pasagdan nga maglaroylaroy ilang mga anak panahon sa lawom na ang kagabhion aron kalikayan nga malambigit kini sa mga binuang ug mahimong badllongon sa katilingban. (BANAT NEWS)
- Latest
