Pagdahili sa yuta sa cantipla delikado, Suma SA MGB
CEBU, Philippines — Nipadala na sa ilang findings ang Mines and Geosciences Bureau -(MGB) Regional Office VII ngadto sa kapitan sa Barangay Sudlon 2 nga si Priscillo Albores nga nagbutyag nga delikado ang area diin nahitabo ang landslide sa niaging adlaw.
Tipik sa findings sa MGB nga peligro gyud ang pagdahili sa yuta sa maong dapit busa girekomendar nila sa kapitan nga i-relocate nalang ang mga namuyo dinhi aron maseguro ang kaluwasan sa mga tawo.
Kahinumdoman adunay pagdahili sa yuta nga nahitabo niadtong Hunyo 26 sa Sitio Upper Cantipla, Barangay Sudlon 2. Niabot ngadto sa 57 ka mga indibidwal gikan sa 13 ka pamilya ang naapektohan hinoon wala ra'y naangol sa nahitabong landslide.
Sa una nga rekomendasyon sa MGB, gipadayag nga kinahanglan nga pabakwiton dayon ang mga tawo sa maong dapit kung naglain ang dagan sa panahon, apan aron maseguro ang kaluwasan niini, labing maayo nga i-relocate nalang gyud kini.
"For their long-term safety, it is recommended to relocate all residents situated along the affected area," suma pa sa MGB.
Ang ubang apektadong residente kasamtangang nag-istar sa balay sa ilang kaliwat sa silingang lugar, samtang ang uban didto nag-istar sa Cantipla Elementary School. — MEL (FREEMAN)
- Latest
