Turista namatay samtang gimasahe

CEBU, Philippines —  Patay ang usa ka 58- anyos nga lokal nga turista sa Lungsod sa Sta. Fe, Isla sa Bantayan human giatake sa kasing-kasing samtang gimasahe sa sulod sa massage parlor sa Barangay Poblacion sa naasoy nga lungsod.

Giila ang namatay nga si Benjamin Roxas, auditor sa usa ka motor company ug residente sa Barangay Hipodromo sa siyudad sa Sugbo.

Sigon ni Police Staff Sergeant Richie Gapo imbestigador sa Sta. Fe Municipal Police Station nga si Roxas naabot sa isla niadtong Biyernes.

Alas-8 sa gabii niadtong adlaw’ng Biyernes niadto kini sa usa ka massage parlor sa Barangay Poblacion aron magpamasahe.

Matud pa human gimasahe ang likod nga bahin gipahayang kini sa masahistang lalake ug gimasahe ang paa niini ug gipangutana pa kung okay ra kini.  Nitubag matud pa si Roxas nga, mura siya og nakatulog, apan sa dayon ng pagmasahe sa pikas paa giingong didto na naglisod kini og ginhawa.

Nikuha kini og tambal  gikan sa iyang bag nga gituohan sa kapulisan nga maintenance medicine niini.

Apan matud pa padayon gihapon kining naglisod sa pagginhawa mao nga nangayo og tabang ang masahista ug gidala kini og ambulansiya sa tambalan.

Nagkanayon si Staff Sergeant Gapo nga gisulti sa mga miresponde nga samtang diha pa sa ambulance gitabang na si Roxas ug pag-abot sa ospital naa pa kini pulso apan wala na matabang pa bisan gi- CPR.

“Nasubay nato ang iyahang estorya naa man gud siya’y kaila diri sa Isla nga nagingon naa siya’y heart problem,” matud ni Gapo.