Online class ang angay panahon sa summer

CEBU, Philippines —  Ang konseho sa Dakbayan sa Sugbo mihangyo sa Department of Education - Cebu City Division alang sa pagsusi sa posibilidad nga mag online classes ang mga estudyante panahon sa “hot summer season.”

Samtang sa Talisay City mas ganahan ang mga kadagkoan didto nga ibalik ang naandang summer break panahon sa ting-init sama sa kaniadto.

Sa resolusyon nga gipangamahanan ni Konsehal Rey Gealon sa pakighinabi sa Banat News  kini miingon nga grabe ang kaninit karong panahona ug taas kaayo angr risgo sa heat stroke ug uban pa nga makadaut sa panglawas sa mga estudyante.

“Dili ta magkompyansa nga painitan atong kabataan kay hilabihang ka-delikado,” matud pa ni Gealon.

Nahisgutan ni Gealon ang pahimangno sa  Philippine Atmospheric, Geophysical and Astronomical Services Administration, (PAGASA) nga kinahanglan  magmatngon ang katawhan gumikan kay ang heat index kay moabot  og 31 ngadto sa 52 degrees celsius panahon sa  summer season.

“The extreme heat will greatly affect the performance of the

students as they can be experiencing dehydration and heat stress, heat exhaustion or heat stroke,” tipik sa unod sa resolusyon.

Masaligon si Gealon nga makakuha og positibong tubag sa DepEd .

Laing resolusyon nga gipasar sa konseho mao ang paghangyo gihapon sa mga kadagkoan sa eskwelahan nga labing  maayo nga likayan lang una ang outdoor activities karong panahona.

Kalabot usab sa sports activities sa mga tunghaan  , nipasalig si Konsehal Donaldo Hontiveros nga dunay mga plano ang DEPED niini  ilabi na sa oras alang sa pagduwa nga dili kaayo tantong mabulad sa init ang mga bata.

Sa pikas bahin, ang pangulo sa DepEd sa Dakbayan sa Talisay uyon nga ibalik sa buwan sa Abril ug Mayo ang school break sa mga tinun-an.

Si Dr. Arden Monisit, schools division superintendent nagkanayon nga iyang nakita ang sitwasyon sa mga kabataan diha sa ilang mga lawak saringan nga grabe ang kainit sa panahon.

Gani gimandoan niya ang mga magtutudlo nga ablihan ang mga bintana ug paandaron ang tanang mga electric fan.

Una niini, si Konsehal Eduardo “Digul” Gullas III, chairman sa committee on Education sa siyudad nipahibawo nga mohimo siya og konsultasyon sa DepEd  sa dili pa mohimo og lakang.

Apan nipadayag na siya daan nga iya sab nga nakita ang sitwasyon sa mga tinun-an ilabi na nga pwerteng inita.

Matud pa ni Monisit nga bisan wala pa sila nagkaestorya ni Gullas apan nipahibawo na siya daan nga suportahan niya kini.

Sa pagkakaron, si Monisit nitambag sa mga magtutudlo nga likayan lang una ang mga outdoor activities ug pirme padad-on og tubig ang mga tinun-an ingon man paypay isip tambal sa kainit sa panahon.

Ang pampublikong tunghaan magsugod ang school break karong buwan sa Agusto ug Septembre.—  Gabriel Bonjoc, IBM (BANATNEWS)