Mga kawani gidasig pagpakita og maayong gawi sa isig ka empleyado

CEBU, Philippines — Giawhag ni acting Cebu City Mayor Donaldo Hontiveros ang mga empleyado sa City Hall sa paggahin og panahon sa pagpasalamat sa mga kaubang trabahante ingon man pagpangayo og pasaylo niadtong ilang napasakitan sanglit walay nasayod kon kanus-a moabot ang kamatayon. Si Hontiveros nihisgut niini atol sa flag raising ceremony nunot sa kamatayon sa iyang ig-agaw nga nagtrabaho sab sa siyudad ubos sa Department of Engineering and Public Work(DEPW).

“Maybe you have the time to show your appreciation to your fellow employees, puwde mo mu-thank you sa isig ka usa ninyo,” suma pa ni Hontiveros.

Atol sa iyang speech, mihunong og pipila ka minutos si Hontiveros aron paghatag og panahon sa mga empleyado sa pagpadayag sa ilang pagpasalamat sa ilang mga kaubang trabahante.

Si Hontiveros nigahin usab og panahon sa pagpakita sa ilang pagpasalamat sa lain-laing mga departamento nga nitabang kanila sa pagpangandam alang sa kahapsay sa siyudad.

Dungan niini, gipasalamatan usab niya ang transport group nga nagmatinud-anon sa ilang mga pulong nga dili moapil sa transport strike.

Gitaho usab ni Hontiveros ngadto sa mga empleyado ang bag-o lang nga pagbisita sa mga top officials sa Philippine Sports Commission nga gipangulohan sa chairman niini nga si Dickie Bachmann aron susihon ang mga programa sa paugnat sa kusog dinhi sa dakbayan.

Ang hepe sa Department of Agriculture, Joey Baclayon, gidayeg usab sa iyang departamento sa pagtabang sa usa ka BPO company, Wipro sa ilang tree-planting activity sa South Road Properties niadtong weekend. Ang grupo nakahimo sa pagtanom og kapin sa duha ka libo ka mga kahoy.— Caecent No-ot Magsumbol (BANATNEWS)