Dugang mga ahensiya sa gobiyerno sa luna sa kapitolyo pabalhinon

CEBU, Philippines — Dugang pito ka mga ahensya sa gobyerno nga anaa nag-okupar sa luna nga gipang-iya sa Probinsya sa Sugbo sa Gov. M Cuenco sa Barangay Banilad sa Dakbayan sa Sugbo ang plano sa Kapitolyo nga ibalhin.

Si Gobernador Gwendolyn Garcia nitanyag sa National Irrigation Administration (NIA), Cebu Medical Society ug Population Commission (POPCOM) nga sila ibalhin sa Department of Agriculture Compound sa Brgy. Guadalupe, Cebu City samtang ang Girl Scouts of the Philippines ug National Food Authority ibalhin sa luna nga giiya gihapon sa Kapitolyo sa  Sudlon, Lahug, siyudad sa Sugbo.

Sumala sa Capitol Information Office, walay nisupak sa mga representante sa maong ahensya sa plano sa kapitolyo atol sa tigom niini uban sa gobernadora niadtong Pebrero 13, 2023.

Sa bahin sa relocation site sa Technical Education and Skills Development Authority (TESDA) Applied Nutrition Center sa Department of Education padayon kini ipaubos sa diskusyon sa dili pa makab-ot ang pinal nga kasabotan.

Kun makakuha na og approval o pagtugot gikan sa ilang ulohang buhatan, makigtagbo balik ang mga representante sa maong mga ahensya ngadto gobernadora aron mahan-ay na ang memorandum of agreement o kasabotan nga pirmahan alang sa relokasyon niini.

Ang luna nga gipanag-iya sa Probinsya diha sa Gov. M Cuenco sa Banilad nga duol sa Cebu IT Park nga gikonsiderar na kini nga prime commercial lot nga plano sa Kapitolyo nga i-develop aron mahimong economic enterprises ug makakuha og kita ang probinsya alang sa mga dugang programa ug proyekto niini lukop lalawigan sa Sugbo. (BANATNEWS)