Basketball kontra ilegal nga drugas gilusad sa CCPO

CEBU, Philippines —  Masaksihan sugod karong Desyembre 23, 2022, adlaw’ng Biyernes ang Cebu City Police Office Thunder Cops Basketball Exhibition- Bola Kontra Droga pinaagi sa pakig-alayon sa  Cebu City Government.

Matud ni Police Col. Ireneo Dalogdog, City Director sa Cebu City Police Office (CCPO) ang maong basketball exhibition game langkuban sa team nila ni Cebu City Councilor Donaldo “Dondon” Hontiveros nga iladong kanhi PBA player uban sa grupo sa CCPO.

Nag-usa ang team nila ni Konsehal Hontiveros ug Col. Dalogdog diin kontrahon nila ang mga maayong players sa nagkadaiyang mga barangay sa dakbayan sa Sugbo diin ang mga police stations maoy mopili og players sa mga barangay ubos sa ilahang huridiksiyon.

Sa December 23 mag-una sila sa Parian Police Station 1 sugdan ang kalihukan sa ala 1 sa udto didto sa gym sa Barangay T. Padilla diin atol sa kalihukan dunay feeding program ug libreng tupi ug medical consultation nga gipangulohan ni Dr. Peter Mancao uban ang kapulisan sa Regional Medical and Dental Unit(RDMU)-7 pinangulohan ni Police Col. Jose Sales.

“Sa Police Station 1 ang under ani nga barangays sa Police Station 1 pito ka Barangay so sa pito ka Barangay magpili sila didto og mga maayo nga baskterball player para maoy ilaban sa amua pud nga mga player,” asoy ni Dalogdog.

Gitataw ni Dalogdog nga sa maong kalihukan manghatag sila og bola sa mga kabarangayan aron sa sports makatutok ang mga tawo ilabi na ang mga kabatan-onan inay sa mga dautang nga binuhatan sama sa pagkalambigit sa ginadiling drugas.

“Kini siya manghatag mi og bola didto sa mga Barangay para ang kining mga kabataan ma-divert nato ang attention instead na ma-engage sila didto sa illegal nga droga ma-divert ang ilahang attention didto sila sa sports mag-focus,” matud ni Dalogdog.

Usa lang kini sa programa sa kapulisan sa dakbayan sa Sugbo aron batukan ang problema sa illegal nga drugas.