DEPW gipangayoan og solusyon sa problema sa karsada sa Sirao

CEBU, Philippines — Gihangyo sa konseho sa Siyudad sa Sugbo ang Department of Engineering and Public Works(DEPW)  nga hatagan sila og konkreto ug long term nga solusyon kalabot sa  isyu sa road slip sa Sirao road.

Giaprobahan sa konseho sa siyudad ang resolusyon nga giduso ni Konsehal Nestor Archival kalabot sa maong hangyo.

Nasayran nga sa niaging buwan ang Sangguniang Panlungsod nipahigayon og executive session uban sa mga representante sa DEPW, Department of Public Works and Highways-Cebu City District Engineering Office (DPWH-CCDEO), Cebu City Traffic Management Cooperation Committee (Cebu City-TMC-COM), Cebu City Transportation Office (CCTO), Ayala Heights Management, konseho sa Barangay Sirao, Malubog, ug uban pang apektadong mga lagyong barangay.

Kini aron hisgutan ang temporaryong pagsira sa dalan sa Balamban-Cebu

Transcentral Highway subay sa Ayala Heights alang sa pagpatuman sa mga counter-measures sa road slip sa lugar nga nadaot sa pagdahili sa yuta tungod sa kusog nga pag-ulan.

Matud ni Archival nga atol sa diskusyon nasuta nga ang dalan sa Sirao usab adunay problema sa road slip.

Gibutyag sa representante sa DPWH-CCDE nga ang maong dalan dili national road.

Gikataho nga ang buhatan ni Archival nakadawat og report gikan sa concerned citizen pinaagi sa messenger kabahin sa kahimtang karon sa dalan sa Sirao paingon sa Transcentral Highway diin adunay na-slide nga mini dump truck paingon sa ubos samtang  naglatas diha sa maong karsada.

Nagkanayon si Archival nga ang Sirao road dili kini sa national ug ang kagamhanan sa dakbayan pinaagi sa DEPW maoy angayang mosulbad sa maong problema. BDB (BANATNEWS)