Pilipinas nakakuha sa “Destination of the Year Award”

CEBU, Philippines — Nakuha sa Pilipinas  ang pasidungog nga “Destination of the Year Award”  atol sa 31st TTG Travel Awards 2022 Ceremony  didto sa Bangkok, Thailand sa niaging adlaw.

Nirepresentar sa nasud sa pagdawat sa pasidungog si Ambassador to Thailand Millicent Cruz Paredes.

Sa iyang acceptance speech, si Paredes nidapit sa katawhan nga sination mismo nga ang Pilipinas mao ang TTG Destination of the Year ilabi na ang mga hiyas nga gidalit sa 7,600 ka isla sa Pilipinas uban sa madasigon nga kultura ug sa pagkamaabi-abihon sa mga Pilipino.

Base sa pamahayag sa Department of Foreign Affairs nitimbaya usab si  Paredes  sa  kakugi sa tanang stakeholders sa travel industry sa nasud ug ang maong  pasidungog  nagpamatuod sa paningkamot  niini sa pagpalig-on sa industriya sa turismo sa Pilipinas.

Gidayeg usab ni Paredes ang ilang determinasyon sa pagprotekta sa industriya sa turismo sa Pilipinas nga mas lig-on ubos sa nadawat nga pasidungog.

Ang Destination of the Year gihatag ngadto sa labing talagsaong destinasyon alang sa paghimo sa mga proactive nga mga lakang ug mga inisyatibo alang sa pagpalambo ug promotion sa travel industry.

Kini ang ikaduhang higayon nga nakadawat ang Pilipinas sa pasidungog diin ang una niadtong tuig 2014.

Ang TTG Travel Awards nga giorganisar matag tuig sukad niadtong tuig 1989 sa TTG Asia nagtumong sa pag-ila sa pinakamaayo sa industriya sa pagbiyahe sa tibuok Asia-Pacific nga rehiyon.  Ang pagpahigayon sa maong kalihokan karong tuiga gibalik na kini sa pisikal.

Atol sa nahisgutang kalihokan, si Paredes giubanan sa Philippine tourism delegation nga gilangkuban sa mga representante gikan sa Tourism Promotions Board ug 16 ka MICE Exhibitors.  —BDB (BANATNEWS)