Masuso giabandonar sa basurahan nagkasakit

CEBU, Philippines — Usa ka masuso nga babae nga gituohang lima palang ka adlaw gikan gipakatawo ang giabandonar sa usa ka karaang tambakanan og basura diha sa Sangi Road sa may Mactan Air Base sa barangay Pajo sa Dakbayan sa Lapu-Lapu kagahapon sa hapon.

Si Barangay Kapitan Lyndel Bullos sa pakighinabi sa Banat News miingon nga usa ka tricycle driver ang nakakita sa masuso samtang kini nangasilyas diha sa bakanteng luna diin nahimutang ang maong karaang tambakanan og basura.

Ang drayber daling nitawag sa barangay hinungdan sa pagresponde ni Tumulak ug mga kaubanan.

Ang masuso dali niyang giputos og panapton ug gidala dayun sa Lapu-Lapu City Hospital. Sumala pa sa kapitan, ang bata naghilak nga walay sapot, aduna pay pusod nga nalaya na, daghang pinaakan sa mga hulmigas ug lamok, gitagiptip, nanimaho ug adunay samad sa ulo ug sa hawak niini.

Matud pa ni Tumulak nga gipahibalo siya sa resulta sa mga doktor bahin sa eksaminasyon sa masuso lima pa kini ka adlaw ug duna kini sepsis o impeksyon sa dugo.

Gi turnover na ni Tumulak ngadto sa City Social Welfare and Development (CSWD) ang masuso. Apan sa pagkakaron giabaga ni Tumulak ang gastos sa gikinahanglang tambal sa sakit sa maong masuso.

Tungod niini nidangop si Bullos sa kapulisan ug mga residente sa palibot diin nakit-an ang masuso kun dunay CCTV sa lugar aron masusi kun kinsa ang nagabandonar sa masuso.

Tungod sab niini, gikatakdang makigtigom si Bullos sa mga barangay health workers alang sa pagpahigayon og campaign mahitungod sa teenage pregnancy. — CNU Intern/IBM (BANAT NEWS)