Kooperatiba alang sa mananagat gitinguhang umolon
CEBU, Philippines — Gitinguha karon sa Cebu City Bantay Dagat Commission nga makaumol og kooperatiba ang mga mananagat sa siyudad.
Tumong niini nga mas madugangan pa ang mga maayong programa alang kanila.
Base sa taho sa Cebu City Public Information Office, gibutyag sa pangulo sa Bantay Dagat Retired Lieutenant General Alexander Solidad nga gisugdan na nila karon ang pagdasig sa kapunongan sa mga mangingisda nga naghulma og kooperatiba.
“Amo na silang gi-identify karon kinsa tong wala pa. Amo silang gi-encourage nga ma -organized sila into a cooperative. That’s the time nga ma-push nato ang mga project, kay naa man sila’y gitawag nato nga legitimate organization nga mailhan sila sa publiko”, matud ni Solidad.
Nasayran nga kon adunay ma-orgnisar nga mga grupo giingong mapalapdan usab ang mahimong madawat nga mga tabang sa mag-uuma gikan sa kagamhanan sa Dakbayan sa Sugbo lakip ang ubang ahensiya sama sa Bureau of Fisheries and Aquatic Resources (BFAR) diin pipila sa mga programa niini mao ang pagpanghatag og pumpboat.
Nakig-alayon ang Bantay Dagat Commission sa nasudnong kagamhanan, non-government organizations, ug sa business sector aron mas modaghan pa ang mga programa nga ilang makuha. Bag-o lang usab sila nga nipahigayon og sunod-sunod nga tigom aron ma-identify ang mga dugang proyekto nga ilang buhaton.
Tumong usab sa Bantay Dagat nga mananom og mga bakhaw diha sa South Road Properties ug maghimo og fishpond.
Gipaniguro usab niini nga walay pinabuthang isda ang makasulod sa siyudad. BDB (BANATNEWS)
- Latest
