Dul-an 100 ang nagka tipos sa Barili

CEBU, Philippines — Moabot ngadto 98 ang natala nga kaso sa tipus o typhoid fever sa lungsod sa Barili karong tuiga sumala pa sa Provincial Health Office.

Matud pa sa IPHO,  37 ang na-admit sa Infirmary didto sa lungsod sukad niadtong Marso 16, 2022 apan karon anaa sa 20 ang kasamtangang nagpaayo samtang tulo sab ang namatay gikan sa Barangay Sta. Ana, Poblacion ug Gunting.

Nasayran ang mga pasyente nakasinati og sakit sa tiyan, diarrhea ug hilanat sulod sa 10-14 ka adlaw.

Ang LGU Barili pinaagi sa Information Office niini nagkanayon nga gipahugtan na nila ang monitoring sa mga tubo sa tubig ug sa tinubdan sa tubig sa lungsod.

Nipahigayon na og water sampling sa 16 ka water sources ug gi-test alang sa e-coli bacteria nga maoy sagad hinungdan sa maong sakit.

“Two water sources failed in the bacteriological test, Dakitanong Pundok Inc. and BARWA,” sumala pa sa inspection report sa PHO.

Wala pa hinuoy kompirmasyon kun sa ilang mga tubod ang tubig nga nakaingon sa pagkasakit sa mga tawo.

Ang LGU Barili nihimo na og manual chlorination sa waterworks sa lungsod.

Sa mga nagkasakit sa tipus, makadawat kini og financial assistance ang pamilya. Apil na kadtong pamilya sa tulo nga namatay.

“With the help of DSWD-7 and the office of Hon. John-John Garcia, nag coordinate na ta sa tagsa-tagsa ka pamilya aron sila mahatagan og minimum P5,000 nga hinabang, aron mogaan-gaan ang ilang mga tulubagon sa tambal ug sa bills sa ospital. Amounts will vary depending on the needs of each family,” sumala sa Facebook page ni kongresista PJ Garcia.

Ang IPHO nipadala na sab og antibiotics (azithromycin) typhoid ug NS1 test kits lakip na sa 70% chlorine granules isip insiyal nga tabang ug ubang mga tambal.

Girekomendar nila sa LGU nganspeksyonon ang tanang pipeline o tubo nga agianan sa tubig kun aduna bay liki o leakage; mopalit og chlorinator sa tanang reservoir; limpyohan ang mga reservoirs ug pangitaon ang posibleng maoy hinungdan sa kontaminasyon aron maaksyonan ug mo-comply sa Operational permit gikan sa DOH. —/IBM (BANAT NEWS)