VECO giawhag motuman sa ilang skedyul sa brownout

CEBU, Philippines — Gidasig sa Mandaue City Council ang Visayan Electric Company (VECO) nga estrikto nga sundon ang ilang ipahibawo nga rotational power interruption schedules.

Kini tungod kay ang dili matag-an nga brownout nakasamok sa adlaw-adlaw nga gimbuhaton sa mga panimalay ug operasyon sa mga negosyo.

Gi-aprobahan sa konseho niadtong Lunes, Sept. 14, ang usa ka resolusyon nga naghangyo sa VECO nga sundon ang gipahibawong iskedyul ug paningkamotan nga mapamubo ang gidugayon sa mga power interruption.

Si Konsehal Jennifer S. Del Mar, nga nagsponsor sa resolusyon, miingon nga ang mga residente nagbase sa ilang adlaw-adlaw nga mga kalihokan sa mga iskedyul nga gipagawas sa power distributor.

Matud niya, mahimong problema kung ang brownout nga gi-anunsiyo dili mahitabo sa gitakdang oras apan ipatuman sa laing panahon, hinungdan nga maghulat ang mga konsumidor ug dili sila makasiguro kung kanus-a sila mopadayon sa ilang mga kalihokan.

“Imbis naay ta buhaton nga importante, dili nato mabuhat kay tungod mag-base ta didto sa mga scheduling nila nga gi-announce,” segun pa ni Del Mar.

Si Jhuckilyn Igot, usa ka laundry shop attendant sa Mandaue City, miingon nga mapahunong ang ilang operasyon matag brownout.

Matod ni Igot, malangan ang paghuman sa labada sa mga customer, hinungdan nga ang uban dili makuha ang ilang mga sinina sa oras nga gipaabot.

Miingon usab siya nga mikunhod ang kita sa negosyo tungod kay ang ubang customer mipili na sa self-service o “Do It Yourself” nga option imbis nga mag-avail sa full-service laundry.

Matud ni Igot, mas dako ang epekto sa brownout sa ilang operasyon tungod kay wala silay generator set.

Si Jay-r Apelacion, nga nagtrabaho sa usa ka water-refilling station, miingon nga apektado usab ang ilang operasyon tungod kay dili sila makarefill og tubig panahon sa brownout.Usahay, matud niya, mapugos sila og balibad sa mga customer tungod kay dili sila makahatag sa serbisyo.

Giila usab sa konseho nga nagpagawas ang VECO og predetermined schedules ug hourly matrices aron mahibaw-an sa mga konsumidor ang gipaabot nga power interruptions.

Apan matud sa konseho, gikinahanglan sa mga konsumidor ang kasaligan ug matag-an nga iskedyul aron maka-adjust sila sa ilang mga kalihokan, lakip na ang mga buluhaton sa panimalay, operasyon sa negosyo, pagtipig sa pagkaon ug paggamit sa backup power sources. (BANAT NEWS)