Disgrasya sa mga motor nikunhod human gipatuman ang Oplan Bantal

CEBU, Philippines — Nikunhod ang mga disgrasya sa kadalanan nga nalambigit sa motorsiklo human sa pagpatuman sa Oplan BanTal:Discipline Zone sukad niadtong Agosto 5, 2026.

Suma pa ni Kenneth Siasar kinsa chief of staff ni Mayor Nestor Archival nga base sa datus nga gipresentar sa Cebu City Transportation Office (CCTO), miabot sa 66 ka disgrasya sa motor ang natala niadtong Hunyo ug 59 niadtong Hulyo. Sa Agosto, mikunhod kini ngadto sa 43 ka kaso.

Gihimug-atan ni Siasar nga ang tumong sa Oplan BanTal: Discipline Zone mao usab ang pagpanalipod sa mga nagmotor nga giisip nga usa sa labing vulnerable nga mga road user.

Suma pa ni Siasar, nakita sa traffic monitoring nga adunay mga motorista nga usahay mo-overtake apan mobalik ra gihapon sa ilang designated lane bisan wala'y personnel sa CCTO nga nagbantay diin usa kini ka kalambuan nga inanay na nga nituhop sa mga motorista ang bag-ong patakaran sa BanTal corridor.  Dili lang sa aksidente nakita ang kausaban apan nakita sab nga nikunhod ang oras sa pagbyahe sa mga sakyanan panahon sa rush hour gikan sa alas 6:00 sa buntag hangtod alas 9:00 sa buntag.

Ang mga pagbyahe paingon sa aminahang bahin sa siyudad molanat kaniadto sa usa ka oras ug 30 minutos. Sa dihang gipatuman na ang Oplan BanTal, mikunhod na ngadto sa 51 minutos.

Ang mga mobyahe paingon sa habagatan, nikunhod na sab ngadto sa 39 minutos.

Si Siasar nagkanayon nga ang kausaban sa batasan sa mga motorista dili dayon makab-ot sulod lang sa pipila ka adlaw apan pinaagi sa pagbansay-bansay sa tanang motorista nga mosunod sa bag-ong lagda sa trapiko. (BANAT NEWS)