Kamatayon sa babaye nga naglutaw sa dagat gisusi pa sa kapolisan

CEBU, Philippines — Dugang pakisusi ang himoon sa kapolisan sa Presinto 3 sa Lapu-Lapu City Police Office (LCPO) alang sa pagsuta kon aduna bay foul play sa kamatayon sa usa ka babaye nga napalgang naglutaw sa Mactan Channel niadtong miaging Biyernes Santo.

Ang babaye nga napalgan nga wa nay kinabuhi mao si Eva Visitacion 34 anyos lumad nga taga Dakbayan sa Zamboanga.

Ang kapuyo niini nga si Rolando Suarez, 36 anyos maoy niila sa patayng lawas sa babaye nga napalgan nga naglutaw sa kadagatan diha sa utlanan nga bahin sa Barangay Pajo ug Poblacion sa Dakbayan sa Lapu-Lapu.

Si Police Major Narciso Abapo, hepe sa kapolisan sa Presinto 3 sa LCPO miingon nga gipaabot pa nila ang resulta sa autopsy sa patay’ng lawas ni Visitacion nga nagbaton og samad sa buko-buko. 

Dili pa matataw sa kapolisan kon agi ba sa binunalan o dinunggaban ang maong samad nga naangkon sa biktima.

Si Abapo miasoy nga si Suarez mitug-an ngadto kanila nga gikalalis niini ang iyang kapuyo nianang gabii sa Huwebes Santo nga maoy hinungdan nga milakaw kini ug wala na mahiuli.

Dihang nakadawat kini og taho labot sa patay ng lawas nga napalgan dali kining mihimo og pakisusi sa kapolisan ug nasuta nga ang iya kining kapuyo.

“Dili pa ta ka establish ug unsay hinungdan ato otherwise mugawas ang result sa autopsy. Wa ta kahibaw basin sa bun-og nga naigo o unsa gyod to iyang samad sa likod,” nagkanayon si Abapo. MEL  (BANATNEWS)