Pagpatitulo sa mga luna sa beneficiaries sa Cebu City gitinguha nga madali

CEBU, Philippines — Gitinguha ni Bise Mayor Donaldo “Dondon” Hontiveros nga madali ang pagpatitulo sa mga luna nga nahimong kabahin sa programa sa Dakbayan sa Sugbo ubos sa Urban Development and Housing Act (UDHA).

Matud ni Hontiveros nga mabuhat kini pinaagi sa paghatag og paspas nga pagtugot sa konseho sa siyudad  kang Mayor Michael  Rama nga mapalusot ang Certificates of Entitlement and Lot Allocation (CELA) sa beneficiaries.

Base sa report sa Cebu City Public Information Office gipadayag ni Rama nga dako og mahatag nga kalamboan alang sa beneficiaries nga matuman ang ilang pangandoy nga makaangkon og luna alang sa disyenteng panimalay. “We will be working very hard, give us a chance. We are offering them our share to leave a legacy of a beautiful City of Cebu”, matud ni Rama.

Samtang ang pangulo sa Division for the Welfare of the Urban Poor (DWUP) Engineer Dante Arcilla nagkanayon nga ang katuyoan sa iyang buhatan mao usab ang pagtudlo sa beneficiaries kabahin sa mga serbisyo niini ug ang pag-edukar kanila sa ilang tulubagon mahitungod sa pagpanag-iya sa luna.

Sa laing bahin, usa ka kalihokan ang gipasiugdahan sa DWUP sa niaging adlaw

diin giimbitar nila ang  pipila ka ahensiya sa gobiyerno , non-government organizations ug uban pa nga mga sektor.

Tumong usab niini ang pagsuta alang sa mga posibleng pag-umol og dugang  programa  alang sa mga kabus. BDB (BANATNEWS)