Mga hiyas ni Don Vicente Rama gihandom

CEBU, Philippines — Ang tinud-anay nga pagmahal ug pakigbisog sa iyang gipangga nga lugar maoy pipila sa mga kalidad nga dili malimtan ni Mayor Michael Rama ngadto sa iyang apohan nga si Don Vicente Rama.

Gisaysay kini ni Rama atol sa pormal nga pagbukas sa mga kalihokan sa nagsingabot nga selebrasyon sa charter day sa Siyudad sa Sugbo. Tipik sa programa mao ang “Media Friends of Don Vicente Rama” diin gihandom ug gihisgotan sa mayor ang mga hiyas sa iyang apohan.

Nasayran nga si Don Vicente ang giila nga amahan sa charter sa dakbayan.

Matud ni Rama nga nakigbisog ang iyang apohan kaniadto nga mahimong siyudad ang Sugbo bisan pa man nga adunay ubang lider ang wala mosuporta niini niadtong higayona.

Atol usab sa pagkukabildo gitumbok ni Rama ang dakong suporta sa iyang mga igsuon sa kalamposan niya sa politika.

Giangkon ni Rama nga nag-agi usab siya og mga hagit sa kinabuhi apan wala kini nahimong babag sa kalamposan sa iyang politikanhong karera.

Ang paghatag og mga maayong programa sa siyudad maoy usa sa resulta sa dakong pagmahal niya sa iyang mga konsituwente. BDB (BANATNEWS)