Paggamit og single-use disposable materials gidili na sa Cebu City

CEBU, Philippines — Giaprobahan sa Konseho sa Dakbayan sa Sugbo ang ordinansa nga nagdili sa paggamit og single-use disposable materials sa tanang establisamento sa siyudad.

Nangamahan sa maong ordinansa sila si Konsehal Eduardo Rama, Jr., Raymond Alvin Garcia, ug Eugenio Gabuya, Jr..

Ang maong ordinansa nag-ulohan kini og “Prohibition of Single- Use Disposable Materials in all Business Establishments".

Ang nahisgutang ordinansa mahimo kini nga ma-apply sa mga hotel ug kan-anan nga anaa sa hurisdiksiyon sa siyudad. Ang Section 6 sa maong ordinansa naglatid nga human sa usa ka tuig gikan sa pag-epektibo sa ordinansa, ang tanang business establishments sama sa hotels, restaurants, fast food chains o susamang

mga establisemento gidid-an sa paggamit sa single-use disposable materials. Human sa duha ka tuig, ang paggamit sa mga disposable nga= materyales sama sa styrofoam o uban pang susama nga materyales isip ikaduhang materyal alang sa mga pagkaon, meryenda, o mga pang-refresh sulod sa mga establisemento sa negosyo ug pag-apod-apod sa single-use disposable materials nga mga sachet o sudlanan sa sabon, shampoo, shower gels, liquid soap, conditioner, o uban pang susama nga mga butang nga gihatag sa mga hotel gideklarar nga supak sa balaod ug gidili ubos sa ordinansa.

Ang Cebu City Environment and Natural Resources Office (CCENRO) maoy mopatuman sa mga lagda ug regulasyon nga nauyon sa mga probisyon sa maong ordinansa.Kini maglakip sa pagpasiugda ngadto sa mga konstituwente alang sa mga alternatibo gikan sa paggamit sa single-use disposable materials ngadto sa paggamit sa environmental friendly secondary packaging materials sama sa eco-bags, woven bags o bayongs, ug uban pang susamang materyales,  pagiya  sa mga buluhaton sa Barangay Solid Waste Management

Committee alang sa hustong pagpatuman sa mga lagda ug regulasyon, pagpahigayon og information campaign sa nagkalain-laing institusyon sa edukasyon sulod sa dakbayan kabahin sa ordinansa, ug uban pa.

Ang tanang business establishments kinahanglang mag-display kini og environmental friendly notice nga “Reduce, Re-use, and Recycle. Use Eco-Bags.”

Ang mga indibidwal nga makalapas sa mga probisyon sa ordinansa silotan og multa nga P500 alang sa unang klaapasan; P1,000 sa ikaduhang

kalapasan; P1,500  o pagkapriso sulod sa duha ka adlaw o ubos sa diskresyon sa korte alang sa ikatulong kalapasan.

Ang mga establisemento nga makalapas pahamtangan kini og multa nga P1,500 sa unang kalapasan; P2,000 sa ikaduhang kalapasan; ug P5,000 o pagkanselar sa business permit nga giisyu sa siyudad alang sa ikatulong kalapasan. (BANAT NEWS)