Karsada temporaryong gisirado sa CCTO

CEBU, Philippines — Sugod kagahapon temporaryong gisirad-an sa Cebu City Transportation Office (CCTO) ang Governor M. Roa Street, Dakbayan sa Sugbo.

Sa maong dalan nahimutang ang usa ka pribadong tambalanan ug matud ni Paul Gotiong, information officer sa CCTO nga gisirado nila ang maong karsada aron paghatag og dalan sa emergency vehicles, ambulances ug private vehicles sa mga pasyente nga nagkinahanglan og emergency assistance ug kadtong mga nagpaabot nga ma-admit sa tambalanan.

“Ato nang gibuhat through the request also of Councilor Dave Tumulak. As of now wala pa tay definite date (hangtud kanos-a sirad-an) the same with what we did sa Chong Hua Hospital, this is to give way lang gyud sa atoang mga kaigsuonan who require emergency services”, matud ni Gotiong.

Ang mga adunay katuyoan sa tambalanan mao ra ang tugotan nga makasulod.

“Kung naa lang gyud sila’y tuyo sa hospital mao ra gyud atong i-allow nga makasulod sad sila, gi-anticipate lang nato ang surge lang gud rather than magkaproblema bitaw ta in the future”, ni Gotiong pa. Nunot niini, ang kagamhanan sa Dakbayan sa Sugbo nangayo og igong pagsabot sa publiko.

Sayo pa, una nang gisirad-an ang usa ka dalan diha sa Fuente Osmeña diin nahimutang ang usa ka pribadong tambalanan diin ang mga pasyente niini anaa sa gawas uban kanila ang nag-oxygen ug ang uban anaa sa lobby. —/BDB (BANAT NEWS)