Shabu, armas sud sa city jail
CEBU, Philippines — Moabot usa ka milyon kapin ka pesos nga balor sa ginadili nga drugas, armas ug uban pang mga kontrabando atol hiniusa nga greyhound operation sa mga tinugyanan sa Philippine Drug Enforcement Agency Central Visayas ug Bureau of Jail Management and Penology sulod sa Cebu City Jail niadtong Huwebes sa kaadlawon.
Ang nasakmit naglangkob sa 32 gramos nga gituohang shabu, .45 caliber pistol, bala, magazine, mga kagamitan sa pagsuyop ug mga mahait nga hinagiban.
Ang warden sa Cebu City Jail nga si Jail Superintendent Jose Rusylvi Abueva , nibutyag nga nagpatabang sila sa PDEA-7 human sila nakadawat og impormasyon nga adunay mga gipalusot nga mga kontabando sa ilang prisohan. Ang maong mga kontrabando nakuha kini gikan sa duha ka mga inmates kinsa ipaubos karon sa ilang disciplinary board ug gibuwag na karon sa ubang mga priso.
Si Abueva mitug-an nga ilaha karong imbestigahan kung nganong nakalusot ang maong ilegal nga drugas ilabi na ang armas nga wala mabantayi.
Ang direktor sa PDEA7 Levi Ortiz, nitug-an nga karon lang usab sila nihimo og susamang operasyon sud sa prisohan tungod sa pandemiya. (BANAT NEWS)
- Latest