5 mil mamumuo gibakunahan atol sa Labor Day

CEBU, Philippines — Malampusong napahigayon kagahapong adlawa ang ceremonial vaccination sa napulo ka mga representante gikan sa nagkalain-laing industriya sa pamuo pahaom sa pag-obserbar sa Labor Day kagahapon.

Ang Department of Health-7 ug Department of Labor and Employment-7 ingon man ang City Government of Naga nangulo sa Ceremonial COVID-19 Vaccination for Priority Group A4 nga nagdala og temang: “RESBAKUNA sa Pilipinhong Mamumuo sa Bag-ong Panahon!”

Haom ang seremonya pahinungod sa mga mamumuong Pilipino nga gipasiugdahan sa  DOLE kagahapon. Dunay dili momenus 5,000 ka mga mamumuo nga naglakip sa mga overseas Filipino workers (OFWs) ang nabakunahan tibuok nasud kagahapong adlawa.

Si DOLE  Secretary Silvestre Bello III miingon nga simboliko ang gihimong pagpamakuna kagahapon tungod kay nag-ila kini sa bayanihong sakripisyo sa mga mamumuong Pilipino pagpadagan sa nasud  ug ang dili ikalalis nga papel pagbuhi sa ekonomiya gikan sa kaparotang dala sa Covid-19 pandemic.

Gipahibalo ni Bello nga dunay 3,000 ka OFWs ug 2,000 ka minimum wage earners nga parehong naapil sa Priority Group A4 o frontline economic frontliners nga makonsiderar nga essential sectors ang bakunahan.

Gipili sila sa nagkadaiyang labor groups ug kadtong gihatag nga lista sa nagkadaiyang OFW organizations.

Sa pikas bahin, ang Associated Labor Unions nagpasalamat sa Employees Compensation Commission sa paglakip sa COVID-19 isip work-related and compensable disease.  “This is good news to 12 to 16 million workers in private and public sector who are compulsory  members of the Social Security System (SSS), Government Service Insurance System (GSIS), voluntary members, overseas Filipino workers and household service workers (kasambahay),” sumala pang Associated Labor Unions spokesperson Allan Tanjusay.

Alang kang Tanjusay dako kaayong matabang kining maong kalamboan sa mga mamumuo nga adlaw-adlaw nga ma-expose sa coronavirus aron lang mapakaon ang ilang pamilya ug nitabang sa pagbuhi og balik sa ekonomiya sa nasud.

“Because of this consideration, ECC & GSIS members who got injured, got sick, were disabled or died due to COVID-19 at work or in transit will now be able to avail of its package of services and benefits,” dugang pang Tanjusay.

Ang ECC services ug benefits package maglakip sa income loss benefit, temporary and permanent disability benefits, medical benefit, ward hospitalization benefit, rehabilitation services, career’s allowance ug P30,000 burial benefit.— IBM (BANATNEWS)