Kapin 5 milyones mabakunahan sa CV

CEBU, Philippines — Gipahibalo sa Department of Health-7 kagahapong adlawa nga moabot 5,634,789 ka tawo sa Central Visayas ang mamahimong bakunahan batok sa COVID-19. Si DOH-7 spokesperson Dr. Mary Jean Loreche sa virtual press conference kagahapon miingon nga 4,973 vaccination teams ang gitahasan paghimo niini sud sa 14 days diha sa 1,944 vaccination posts nga lihukon sa 9,945 ka mga tawo.

Si Loreche miingon nga ugmang adlawa Marso 3, o 4  2021 nila gipaabot nga mangabot ang Sinovac vaccines gikan sa China direkta dinhi sa Cebu.  Una nang naabot ang 600 mil ka Sinovac vaccines didto sa Pasay City sa miaging adlaw nga diin si Pres. Duterte mismo maoy misugat.

Si Loreche miingon nga ang mga healthcare workers sa Vicente Sotto Memorial Medical Center (VSMMC) maoy unang makadawat sa COVID-19 vaccines alang sa Cebu.  Gibanabanang 2,900 healthcare workers sa VSMMC nga gikonsiderar nga COVID-19 referral hospital sa Central Visayas ang gikatakdang bakunahan.

Giklaro hinuon ni Regional Epidemiology and Surveillance Unit head (RESU-7) Dr. Juanito Zuasola Jr. nga di tanang healthcare workers sa VSMMC ang uyon nga bakunahan og Sinovac. Matud niya dili kini pinugsanay.

Hinuon silang Loreche ug Zuasula mipadayag nga andam silang mauna sa pagpabakuna aron ipakita sa publiko nga luwas kining gamiton ug epektibo. Sa pikas bahin, si Dr. Van Baton, DOH-7 regional medical coordinator for Emerging and Re-emerging Infectious Diseases miingon nga target sa gobiyerno nga mabakunahan ang 70 milyones ka tawo karong tuiga ug 40 milyones sa sunod tuig, 12 milyones pagkasunod pa gyud nga tuig. Sa kalambigit nga balita, andam na ang Visayas Covid-19 Vaccination Operations Center sa Oakridge sa Mandaue City sa umaabot nga tigom nga himnuon uban sa opisyales sa mga ahensiya sa gobiyerno nga naglakip kang Health Secretary Francisco Duque III, vaccine czar Sec.Carlito Galvez ug Presidential spokesperson Harry Roque ugmang adlawa (Marso 3).

Matud pang Regional Development Council chairman Kenneth Cobonpue kinsa mao sab ang co-chairman sa Project Balik Buhay duna silay panagtigom nga buhaton sa maong dapit.Human sa tigom gikatakdang makigkita silang Duque, Roque ug Galvez sa mga opisyales sa LGUs aron planuhon ang pagpamakunang himuon.— Caecent No-ot Magsumbol /IBM (BANATNEWS)